ЗА НАС

Ова подразбира спроведување на постапка за регистрација на нови учесници и водење евиденција на сите договори склучени со учесниците на пазарот на електрична енергија, вклучително и водење на регистар на учесниците на пазарот. МЕМО изработува и дневен пазарен план и ги евидентира склучените трансакции на пазарот на билатерални договори согласно конечните физички распореди кои ги добива од учесниците.
Дополнително, МЕМО постојано ги следи состојбите и појавите на пазарот на електрична енергија со цел спречување на неконкурентни однесувања и овозможување на транспарентно и конкурентно трговско окружување за сите учесници на пазарот и редовно и навремено ги објавува сите информации кои се неопходни за непречено функционирање на пазарот електрична енергија и развојот на конкурентските односи.

МЕМО ги пресметува месечните дебаланси на балансно одговорните страни и изготвува предлог пресметка за трошокот за дебалансите за секоја Балансно одговорна страна, согласно мерењата на електрична енергија добиени од операторот на електро-преносниот систем и операторот на електро-дистрибутивниот систем, а со цел спроведување на финансиско порамнување на договорените и остварените трансакции на пазарот на електрична енергија.

Истовремено, МЕМО води евиденција на сите Договори за формирање балансни групи кои се склучени помеѓу МЕМО и учесниците на пазарот на електрична енергија и ги евидентира сите промени во однос на припадноста на учесниците во одредена балансна група како: пристапување на нови членови, префрлување на членови од една во друга балансна група и исклучување на членови на барање на балансно одговорните страни.

МЕМО е балансно одговорна страна за повластените производители кои користат повластени тарифи за производство на електрична енергија од обновливи извори. Како БОС, МЕМО врши предвидувања на производството и ја откупува целата произведена електрична енергија произведена од ППЕЕПТ и истата ја продава согласно Методологија предвидена во правилата за пазарот на електрична енергија.

МЕМО го води и регистарот на сите повластени производители кои користат повластена тарифа за производство на електрична енергија од обновливи извори.

Дел од активностите кои ги извршува МЕМО е постојано следење на промените во енергетската регулатива и активно учество во креирањето на регулативата поврзана со пазарот на електрична енергија во Република Северна Македонија. Како Оператор на пазар на електрична енергија соработува со операторите на пазарите на електрична енергија на другите земји и е вклучен во сите регионални и меѓународни организации и асоцијации кои се од интерес за работата на МЕМО и развојот на пазарот на електрична енергија во Република Северна Македонија.

Главниот фокус на МЕМО во поглед на развој на пазарот на електрична енергија е воспоставување на организиран пазар за тргување ден-однапред. Овој проект започна како иницијатива на Секретаријатот на енергетската заедница за воспоставување и интеграција на ден однапред пазарите на електрична енергија во земјите од западен Балкан и сега е во комплетна надлежност на МЕМО.

Во насока на остварување на оваа цел, МЕМО беше назначен за Оператор на организираниот пазар на електрична енергија од страна на Владата на Република Северна Македонија, по што започна со спроведување на активности за исполнување на потребните технички услови кои ќе овозможат воспоставување на организиран пазар на електрична енергија во Република Северна Македонија

МЕМО е полноправен член на „Јуропекс“ (Europex) – Асоцијација на европски берзи на електрична енергија, која ги застапува интересите на европските оператори на пазарот на електрична енергија и гас.

Во контекст на своето членство, МЕМО активно учествува во неколку работни групи и придонесува во понатамошното обликување на европската енергетска регулатива на ниво на ЕУ и на Енергетската заедница.

ЕМИ работната група е формирана од страна на УСЕА и УСАИД, операторите на електро-преносните системи и операторите на пазари на електрична енергија на југоисточна Европа.

Целта на работната група е размена на податоци и подготовка на анализи помеѓу систем операторите, операторите на пазар на електрична енергија и регулаторите, како и останатите учесници на пазарите на електрична енергија со што треба да се овозможи побрза транзиција и интеграцијата на пазарите на електрична енергија во регионот.

Овој проект е продолжение на иницијативата на Секретаријатот на енергетската заедница за воспоставување и интеграција на ден-однапред пазарите на електрична енергија во земјите од западен Балкан.

Како резултат на Меморандумот за соработка, кој беше потпишан од  страна на систем операторите (МЕПСО и ЕСО) и операторите на пазар на електрична енергија (МЕМО и IBEX) на Република Северна Македонија и Република Бугарија, се формира работна група која ги спроведува активностите за спојување на организираните пазари помеѓу двете земји.